WALAY lalis, nagmalampuson ang pagpahigayon sa Pasigarbo sa Sugbo niadtong Dominggo. Ang maong kalihukan tipik ug kabahin gihapon sa selebrasyon sa ika-450th founding anniversary sa lalawigan sa Sugbo. Tinuod daghan ang nalingaw og naghatag kini og kahigayonan sa mga nagkalain-laing local government units (LGUs) sa lalawigan nga mabandera ang ilang mga festivals nga gibase sa local delicacies.

Nakadugang usab kini sa pagpalambo sa turismo dinhi sa Sugbo kay daghan man ang ma-ikag nga mga lokal ug langiyaw nga mga turista ang mobisita kay mabaniog man kini sa ubang mga lugar. Usa baya ang Sugbo nga dagsa-an sa mga turista gumikan sa atong mga maanindot nga talan-awon og mga beach resorts.

Successful lagi pero makalolooy ang nga participants nga kadaghanan mga estudyante. Tiaw ba nimo kanang alas dos na sa kadlawon nahuman ang presentasyon. Gisugdan og alas dos sa hapon ang street dancing gikan sa Capitol grounds paingon sa Cebu City Sports Center agi sa Osmena Blvd. Unya alas 6 na sa gabii, gisugdan ang showdown sa 44 ka mga participating contingents kay siguro gihuwat nga mongitngit aron nindot tan-awon ang background sa mga lights o suga.

Sus, unsa pa may kusog o energy sa mga participants nga walay klarong tulog. Gipasayaw ubos sa naglagiting sa kainit adlaw unya naabtan og kadlawon. “Low bat” na intawon ang lawas sa mga bata. Sukad pa niadtong Biyernes o Sabado walay tarung pahuway ang mga participants kay nag-praktis pa diha sa sports center.

Simbako kon adunay mga tinun-an nga magkasakit ug ma-hospital, kinsa man ang angayan basulon o manubag? Aw, adto nato papangayoon og tambal o tabang sa ilang mayor o ba kaha sa Kapitolyo. Mas maayo nga angayan kining tun-an sa mga organizers aron dili na masubli kining maong panghitabo. Nganong dili man sugdan og sayo o limitahan ang participating contingents sama sa Sinulog para dali mahuman ug dili masakripisyo ang panglawas sa mga kabataan. (bobbygnalzaro@gmail.com)