PASPAS naman lagi ang pagpagawas sa resulta sa mga testing ug re-testing sa Department of Health (DOH 7). Samtang nagsaka ang positive cases sa Covid 19 dinhi sa dakbayan sa Sugbo, nagsaka na usab ang gidaghanon sa recoveries o nanga-ayo sa maong balatian. Kagahapon adunay 2,583 positive cases samtang aduna say 1,557 ka mga recoveries. Adunay 60.28 per cent recovery rate. So, dili na taas kaayo ang gintang.

Niadtong miaging mga semana, halos mag-protesta na ang mga nag-positibo nga naa sa mga barangay isolation center (BIC) gumikan sa kalangay sa resulta sa ilang re-swabbing. Ang DOH maoy problema kay dugay silang makapagawas sa resulta. Ang rason gumikan kay kulang sa mga ekipo sa pag-analyze sa mga specimen. Karon, medyo paspas na ang resulta sa testing.

Dili na kaayo ‘alarming’ ang pagsaka sa mga kaso gumikan kay taas man usab ang recoveries. Aduna nay psychological effect gumikan kay samtang mo-ingon kita nga ang Cebu City maoy adunay pinakataas sa kaso sa positibo apan daghan man usab ang nanga-ayo og gamay lang ang mga nangamatay. Mao nga bisan medyo relax na gamay ang atong kahimtang gumikan kay ubos naman kita sa general community quarantine (GCQ), dili gihapon ta angay mokompiyansa.

Aduna koy nabasahan nga artikulo nga sinuwat sa usa ka foreign writer nga gibase usab niya sa Center for Disease Control (CDC) sa Estados Unidos. Didto sa mga estado sa Virginia ug Maryland, wala na sila magpahigayon og re-testing sa mga positive cases aron pagsuta kon naayo na ba siya sa Covid o wala nay virus.

Ang ilang gihimo didto obserbasyon na lang sa mga positive cases. Kon mawala na ang mga sintomas sama sa ubo, hilanat ug sip-on sulod sa 72 oras nga walay medical intervention o walay gi-inum nga tambal ang pasyente, makonsiderar nga negative na ang pasyente sa virus ug puwede nang makagawas sa isolation facility. Mao pod ni ang gisagop sa Singapore nga gisunod ni Gov. Gwen Garcia. Mao nga si Garcia wala na mopahigayon pa og testing sa mga manguli sa probensiya basta wala lay simtomas. (bobbygnalzaro@gmail.com)