ATONG gisaulog karon ang ika-35 ka tuig nga anibersaryo sa malinawon ug makasaysayanong Edsa People Power Revolution nga nahitabo niadtong Pebrero 23 ngadto 25, 1986. (Alang sa wala masayod, kanang Edsa mao kana ang pinakataas o sentro nga kalsada sa Metro Manila. Gikuha kana sa pangalang Epifanio Delos Santos Avenue. Edsa for short. Si Delos Santos o Don Panyong, usa ka historian, journalist ug civil servant niadtong 1920’s. Natawo siya 1871 ug namatay 1928). Ang makasaysayonon ug bloodless revolution maoy nakapalagpot sa diktatoriyang pangagamhanan ni Ferdinand Marcos nga maoy nagdumala sa renda sa atong pangagamhanan sulod sa pipila ka dekada ug maoy utok sa Balaod Militar.

Human sa mangitngit nga kagamhanan gumikan kay daghan ang mga abuso ug pagyatak sa tawhanong katungod, mipuli ang demokrasyang pangagamhanan ni Cory Aquino nga maoy gi-ilang icon kun hulagway sa demokrasya. Nagtuo kita nga gumikan sa maong makasaysayanong rebolusyon, adunay dakong kausaban nga mahitabo sa atong pangagamhanan.

Nagtuo kita nga mopatigbabaw na ang demokrasya, mawala na ang kurapsiyon ug ang pagtayak sa tawhanong katungod ug pagpamatay ug mahaw-as na kita sa kawad-on ug kalisdanan nga maoy migapos kanato sulod sa pipila ka katuigan. Apan pakyas diay kita gumikan kay ang atong mga masakit nga kasinatian sa pangagamhanan ni Marcos ato gihapon nga matagamtaman ug masinati sa misunod nga mga administrasyon. Mas migrabe pa.

Unsa man ang atong naani sa panahon ni Cory? Migrabe ang pagyatak sa tawhanong katungod. Gani dihay mga dagkong masaker ug naglambigit mismo sa mga trabahante ni Aquino sa Hacienda Luisita. Wala tuod mangurakot si Cory apan ang iyang nga hinanib, kaalyado ug mga kabanay maoy nipahimulos. Ang iyang mga kabanay ni-take over sa mga kabtangan ug negusyo sa cronies ni Marcos nga gi-sequester sa gobiyerno.

Sa mga nisunod nga administrasyon ni Fidel Ramos, Joseph Estrada, Gloria Macapagal Arroyo, Benigno Aquino III ug karon ni Rodrigo Duterte, ang atong gipakigbisogan sa panahon ni Marcos diin midaug gyud gani kita pinaagi sa gahum sa katawhan, nawala og napurnada daw buwa. Nasayang ang tanan.