UNSAON man ta ni ron nga upat man ta unya usa ra man ning plaque?” nangutana ang usa nako ka bandmate human sa awarding namo isip “Outstanding Institution” atol sa kasaulogan sa 83rd Charter Day sa Syudad sa Sugbo niadtong Lunes.

“Paseroki lang na,” ingon ang usa. “Ipa-3D printing nato,” ingon pud ang usa. “I-rotation ta na, ihatod-hatod sa balay morag istatuwa sa Birhen,” ingon pud ko.

Nangatawa ming tanan.

Apan luyo sa among bahakhak naa ang kamatuoran nga sagrado ang plake alang namo nga membro sa Missing Filemon. Nagsimbolo kini sa tanan namong naagian isip banda nga naninguhang mapalambo ang pinulongang Bisaya diha sa musika.

Nagpahinumdom ang plake namo niadtong nagsugod pa mi nga manggawas ang nga tawo sa bar kon kami na ang manukar kay baduy ang Bisaya para nila. Nagpahinumdom ni niadtong panahon nga mang-hitch mig trak de karga padung sa among tukar kay wa mi laing masakyan.

Nagpahinumdom ni namo sa daghang butang, dili namo masulti dinhi ang tanan kay buhi pa ang mga nahingtungdan, nga misuway kanamog ingon nga pangundang na mo anang inyong kabuang kay wa kanay padulngan.

Apan kay gahi man mig ulo, wa mi patuo.

Labaw sa tanan, ang plake nagpahinumdom namo sa tanang tawo nga mingtuo sa among gibuhat. Nag-una na dinhi among pamilya, nga bisan tuod adunay pagduda sa among kabuang, nagpaluyo gihapon namo dalang bagutbot. Sila ang among mga ginikanan, mga igsoon, mga suod nga higala, mga katagay latas sa panahon.

Ang pasidungog usa usab ka wa damhang butang. Kinsay magtuo nga ang Syudad sa Sugbo mohatag og pasidungog sa usa ka rock band isip “Outstanding Institution”? Salamat ninyo, mga mam ug sir.

“Institusyon!” nagdungan mig syagit dihang gitawag na ang Missing Filemon isip awardee.

Paghuman sa programa, mihangyo ko sa banda nga ako lang sang dad-on ang plake sa amoa sa probinsya. Ug didto atubangan sa lubnganan sa akong mama, papa ug duha ka igsoon, akong gihalad ang plake ug namulong, “Salamat.”