BUOT sa National Food Authority (NFA) nga patas-an ang presyo sa ilang ibaligya nga bugas humay.

Sumala sa NFA administrator–in-charge Tomas Escarez nga gikan sa presyo karon sa NFA rice nga P27 umentohan kini sa P33 ngadto sa P35 matag kilo.

Sumala sa NFA nga bukas sila kon padayon nilang ibaligya kini sa P27 matag kilo kay P20.70 matag kilo sa palay ang ilang palit gikan sa atong mga mag-uuma. Human sa pagaling ug ubang mga proseso buot kini nilang ibaligya sa P33 nga able lang, sa ato pa wala silay ginansiya. Kon ila kining mabaligya sa P35 aduna na kuno silay gamay nga tubo.

Sa press conference uban kang Ilocos Norte governor nga kandidato pagka-senador Imee Marcos niadtong Miyerkoles nga ang budget sa NFA kapin sa P7 bilyones karong tuiga. Apan inay nga ipalit kini og palay sa atong mga mag-uuma, gipamayad man hinuon kini sa ilang utang. Nahibaw-an nga P6 bilyones kun 90% ang ilang nagasto sa pagpamayad sa ilang utang kun loan tungod sa kanunay nila og palit og bugas gikan sa gawas sa nasud. Gipalit nila kini og P29 apan gibaligya lamang kini og P25.

Sa laing bahin, nireklamo ang mga mag-uuma nga ang NFA ubos kaayo og pinalitan sa ilang palay nga tag P17 lamang matag kilo.

Ato diay nga gi-alkansihan ug gi-subsidize og P4 ang pagbaligya sa bugas humay gikan sa gawas sa nasud apan gibarat ang pagpamalit sa palay sa atong kaugalingong mga mag-uuma.

Inay nga ihatag sa gobiyerno ang gipangayong umento sa presyo sa NFA mas maayong tarungon nato ang pagpadagan niining maong ahensiya.

Mas maayo man gani nga ang atong rice farmers maoy i-subsidize ug tabangan sa Department of Agriculture (DA) aron mominus ang presyo niining nag-una natong palaliton.

Niatras na man hinuon kita niining atong pagpangita og solusyon sa nagkamahal nga presyo sa bugas ug ubang mga nanag-unang palaliton. Inay nga minusan, patas-an na man hinuon ang presyo sa NFA rice. Si Imee Marcos misaad nga iyang pangitaan og mga paagi aron moubos pa ang presyo sa bugas inay nga umentohan ang presyo niini kon makadaug siya pagka-senador. Akong awhagon ang atong kongreso nga dili tugotan ang NFA nga umentuhan ang presyo sa ilang ibaligyang bugas humay.

• • •

Usa ka suod nakong higala ang mibulontaryo sa iyang pangagpas kon nganong midailos si Gob. Junjun Davide ug milansar nalang sa pagka-bise gobernador.

Sumala niya nga daku ang pagtuo ni Davide nga modaug si Kongresista Gwen Garcia nga midagan pagbalik sa pagka-gobernador batok kang Bise Gob. Agnes Magpale ug siya (Davide) maoy mapiling bise-gobernador. Human sa eleksiyon, sumala sa akong higala, paninguhaon kuno ni Davide nga matangtang si Garcia aron siya gihapon maoy molingkud sa kapitolyo isip gobernador. Kon tinuod kini, smart gyud kini si Davide.

(mannyrabacal1144@gmail.com)