Karong tuiga ang Sinulog festival sa Cebu City gitawag na og One Cebu Island Sinulog sigun sa nauyonan sa mga local government unit (LGUs) sa lalawigan sa Sugbo. Gipasigarbo na nga kining panaghiusa angay sundon sa ubang mga dapit sa Pilipinas. Mao usab kini ang tema ni Presidente Bongbong Marcos ug Bise Presidente Sara Duterte Carpio.

Sulondon gayud tinuod kining panaghiusa sa Cebu City, Mandaue City, Lapu-Lapu City ug Cebu province apil ang kalungsoran ug component cities niini. Ang Sinulog festival, labi na ang mardi gras, tabangan na sa tibuok Sugbo aron mas mahimong mabulokon ug malampuson ang maong kalihukan. Apil na usab niini ang venue kun mga dapit asa himoa ang usa ka kalihukan.

Apan samtang mao kini ang gituhoan sa katawhan, mitumaw man ang reklamo ni Gobernador Gwendolyn Garcia niining pagbalhin sa venue sa Sinulog festivities sa South Road Properties (SRP). Gusto sa gobernador nga magpadayon lang karong tuiga ang mga kalihukan adto sa Cebu City Sports Center (CCSC) sa Abellana High School grounds.

Ang nabalak-an sa gobernador mao ang iyang mga botante nga nagpuyo sa habagatan nga dili na makaagi sa SRP kon masirhan na kini. Nahadlok siya nga mababoy ang mga sakyanan kon ang tanan anha na mangagi sa Natalio Bacalso. Gihisgutan usab niya ang seguridad sa halapad nga SRP nga adunay tag-as nga mga building diin lisud nga bantayan sa mga tinugyanan sa balaud. Gilakbitan usab sa gobernador ang pagtabang sa mga negusyante nga ania sa sentro sa siyudad nga wala pa makabawi sa ilang kita tungod sa paghunong sa Sinulog sa miaging tuig tungod sa pandemya.

Ang nakapahibung kanako mao ang giingon ni Gob. Garcia nga mas maayo kuno unta og gisabutan pa kining pagpangandam sa pagsaulog sa Sinulog sa mga lider sa lalawigan. Ngano man gi-solo lang sa Cebu City ang desisyon? Unsa man diay kining One Cebu Island Sinulog sa ngalan lamang?

* * *

Unsa may katinuoran niadtong balita nga adunay coup d’etat nga mahitabo niadtong Sabado tungod sa pagtudlo pagbalik kang General Andres Centino isip chief of staff, Armed Forces of the Philippines (AFP) puli kang Lieutenant General Bartolome Vicente Bacarro nga naghupot sa maong pwesto sud sa lima ka buwan?

Wa man tingai hinuoy nahitabong coup apan kadudahan ngano nga wala motunga si National Defense Officer-in-Charge Jose Faustino Jr. sa change of command ceremony.

Wa usab kunoy parade nga nahitabo tungod kay dinalian ang maong turnover. (mannyrabacal1144@gmail.com)