Nagkadako ang community sa biseklita. Ang timailhan niini mao ang nagkadaghan nga bike ug repair shops ug online sellers. Lahi

sa ubang sports, ang biking mahimo rang leisure o kalingawan. Lesser ang effort kon naa ra ka sa patag ug dug-ol ang biyahe.

Di sama sa running nga bisan hinay ka ra, ang strain sa imong muscles ug kabukogan bug-at itandi sa bike nga medium ra ang impact. Mahimo ra kang makasuroysuroy with less effort kay sa modagan o maglakaw ka lang.

Sa akoa lang, dihang dako pa kaayo ko og time, magsuroysuroy ra ko kon asa ko ganahan mokaon, moestambay uban sa mga higalang bikers in a short notice.

Ang nakaanindot pa sa bike kay nagkadaghan na ang mga establisemento nga niila sa biking community hinungdan nga nagbutang sila og mga lugar alang sa bikes. Naa ni sa Cebu Business Park ug IT Park.

Nakakita sab ko sa SM City apan wa kaayo ko ma impress. Mas ganahan ko sa SM Seaside kay naa sa ilawom nga naa sa parking area sa mga sakyanan.

Apan kinahanglan kang magdala og kadena nga lisod putlon. Ako sab advice aning malls, anha kini ibutang sa dunay mga guard ug dali makita kon dunay nagplano og dautan.

Di lang ko modetalye kon nganong kinahanglan ni kay ang kawatan nga suhitog biseklita, wa kinahanglana nga kawaton ang tibuok bike.

GANAHAN

Sa akong nabantayan, mas daghang bikers akong nakitang manulod sa SM Seaside. Basin sab tungod kay mas daghan ang kasuroyan sa mga biker sa Seaside kay daghan ang vacant lots. But basin sab tungod kay mas secure ang bikes sud sa parking area.

Way biker nga moduaw og dapit nga di mogasto, mangape man, mokaon ug uban pa. Kadtong mga establisemento nga dunay background sa biking ang management nagtanyag og maayong serbisyo dagsaon pirme.

Kaniadto, manuroy mi sa IT Park, ang among biseklita mahimo rang i-park sa kilid sa business establishment, sama sa coffee shop ug mga kan-anan. Karon wa na ko kakita og bikers nga nakahimo ani.

Ang favorite spot namo kaniadto mao ang labing unang McDonalds branch. Daghang bikers diha but karon, wa na ko makakita bisan usa.

Contrast kaayo ni sa mga bag-ong kan-anan ug coffee shops sa bukid.

ANTI BIKING?

Dunay perception ang bikers nga daghan pa gihapon sa mga establisemento sa Metro Cebu ang anti biking. Kini tungod kay papahawaon o abugon sa mga security guard, nga igo ra sab nga nagtuman sa sugo sa management.

Bisan gani sa motorsiklo, isig isigon ka sa mga guard kay mao say mando sa management. Kadaghan na ko naka encounter niani, labina sa mga banko ug mga kan-anan.

Apan ang mga establisemento sa kabukiran mas ganahan ani kay mas managhan ang ilang mga kustomer nga bikers, biseklita ug motorsiklo, tungod aning attitude ug pagtagad sa mga business establishments sa amoang komunidad sa mga pedalist.

Kaanindot unta kon dunay bikeshop, kan-anan nga at the same time, bike ug repair shop nga one-stop shop lang. Dugukon gyud ni.