KIDAPAWAN CITY — Gikapoy na ug gusto ng manginabuhing magmalinawon maoy rason sa pagsurender sa upat ka mga terorista alas 2 sa hapon, Sabado, Marso 16, 2024 sa probinsiya sa Cotabato.

Ang mga rebelde mga sakop sa Bangsamoro Islamic Freedom Fighters (BIFF-Karialan Faction).

Misurender ang upat ka mga terorista sa mga sakop sa 34^th Infantry Battalion Philippine Army nga gipangulohan ni Colonel Rey Rico sa Barangay Salunayan Midsayap Cotabato.

Dala sa mga rebelde sa ilang pagsurender ang upat ka mga tag-as nga matang sa armas, mga eksplosibo, mga bala ug mga magasin.

Pormal nga gidawat ang upat ka BIFF nila Midsayap Mayor Rolly Sacdalan, DSWD 12 Regional Director Loreto Cabaya Jr., ug 602^nd Brigade Commander Brigadier General Donald Gumiran.

Nakadawat sab og inisyal nga tabang ang mga rebelde gikan sa LGU-Midsayap.

Ang pagsurender sa mga terorista dungan sa ika-50 anibersaryo sa 34^th IB.

Nanawagan si Colonel Rico sa ubang mga rebelde nga musurender na ug manginabuhing magmalinawon uban ang ilang mga mahal nga pamilya.