USA ang samdan samtang laing duha nga kauban niini sa Communist New People's Army Terrorist (CNT) ang nadakpan sa nahitabong engkuwentro tali sa hiniusang puwersa sa kasundalohan alas 5:58 sa hapon niadtong Miyerkules, Disyembre 1, 2021, didto sa Sitio New Laslasakan, Barangay Palma Gil, Talaingod, Davao del Norte.

Nasamdan giila nga si Masarinda Balite alyas Alina nga giingong medical ug supply officer sa Sub-Regional Guerilla Unit, Sub-Regional Committee 5 sa CNT, kinsa daling gitambalan sa mga sundalo.

Si Balite usa sa kapin 10 ka mga sakop sa NPA sa nahitabong ginukdanay ug pinusilay nga milungtad og 20 minutos tali sa mga tropa sa 56th Infantry Battalion, 27IB ug 3IB. Ang iyang kauban nga si Odessa Dumol alyas Ann nadakpan sab.

Gitug-an ni Colonel Consolito Yecla, commander sa 1003rd Brigade, nga nahitabo ang pinusilay sa dihang ang grupo nga gipangulohan ni alyas Macky mibalibad nga motahan bisan pa sa paningkamot ni ni Ka Eloy kinsa nanawagan alang sa nahabiling mga lumad nga CNTs nga dawaton ang peace program nga gihanyag sa gobyerno.

Narekober sa mga sundalo ang tulo ka M-16 assault rifles ug usa ka M-4 rifle nga nahabilin sa dalan nga gisibatan sa mga rebelde.

Sa pikas bahin, sayo sa hapon sa mao gihapong adlaw, duha ka sakop sa CNTs ang misurender ngadto sa kasundalohan nga sila Nester Tausan alyas Bong, supply officer sa Squad Primera Andoy sa SMRC, 19, molupyo sa So Sambulongan, Palma Gil, Talaingod; ug Wena Teklonay alyas Sirena, supply officer sa Platoon Basil sa SMRC, 18, molupyo sa So Muling, Gupitan, Kapalong. (WGM)