HUMAN madakpi ang aktibong pulis nga gidestino sa Marilog Police Station sa siyudad sa Davao, mga awtoridad nagbutyag nga duna pa sila karoy gipanghap-an nga kapin napulo ka mga pulis, apil ang tulo ka opisyal sa pulis kinsa nalambigit sa ilegal nga druga.

Si Police Regional Office (PRO)-Davao Director Marcelo Morales nagbutyag nga dunay pito ka mga police non-commissioned officer ug tulo ka mga commissioned officers kinsa ilang gihapa-hapaan ning panahona dinhi sa rehiyon.

"May mga raw information din na may mga bagong names ng mga PNP (Philippine National Police) personnel na allegedly involved din sa illegal drugs activities so min-omonitor naming lahat yon," butyag ni Morales.

Sa dihang gipangutana unsang yunit ang maong mga pulis nadestino, siya nibalibad nga ibutyag kini aron nga di mabulabog ang nagpadayon nga pag-ukoy ug ang "case build-up."

Sayo niini, badlungon nga pulis nga nailhang si Police Staff Sergeant Elcelito Colita, 35, nadestino sa Marilog police, minyo ug molupyo sa Km. 12, Santo Rosario, Sasa, Davao City, ug iyang kauban nga si Glenn Art Muring, alyas "Dodong," 40, way trabaho ug molupyo sa Purok Santa Teresita, Buhangin, Davao City, nadakpan sa usa ka entrapment operation niadtong Miyerkules sa gabii.

"Wala pa sa watchlist namin itong si Colita. Ngayon lang siya lumutang pero may mga raw information na na dig up ang Talomo Police Station noon pa na 'yong pangalan nito ay involved hindi lang na-develop until last night," ni Morales.

Human sa insidente, iya dayong gimando ang pagtaktak sa station commander sa Marilog police ug ang igsuon ni Muring, kinsa usa ka opisyal sa pulis tungod sa kapakyas nga mamonitor ang kalihukan sa mga suspek.

"Yong mga stations commander ay binabalaan ko to closely monitor your personnel because you are responsible kung ano 'yong mga activities na ginagawa ng mga taohan ninyo. You will be charged administratively kung ito ay na-involved sa mga heinous crimes or mga illegal drug operations," pagklaro ni Morales. (Juliet C. Revita)