MOKABAT na sa napulo ka mga vintage bombs ang nakalutan sa usa ka backhoe operator sa Purok 7, Coastal Road, Barangay Talomo Proper, Davao City alas 4:30 sa hapon niadtong Lunes, Hunyo 28.

Nasayran nga usa ka Carlos Gempesaw, 55 anyos, taga Sta Cruz, Davao del Sur, kinsa operator sa backhoe, ang daling miduol sa pulis ug nagpangutana labot sa iyang nakalutan.

Sumala ni Police Major Sean Logronio, hepe sa Talomo Police Station, nga dali sab silang nanawag sa EO9/K9 Office aron sa pagkompirma sa nakalutan.

Ang EO9/K9 mikompirma nga ang mga vintage bomb mga UXO Projectile munitions nga dunay gibug-aton mga 500 lbs ang kada usa ug dunay gitas-on nga 41 inches (length) ug 33 inches (circumference), ug nataya na.

Kahinumdoman nga sa miaging semana 78 ka mga vintage bombs ang nakalutan sab sa backhoe sa Barangay Lacson, Calinan District, Davao City.

Anaa na sa pagkustodiya sa awtoridad ang nasampit nga mga vintage bombs. (Jeepy P. Compio)