DAVAO DEL NORTE -- Gikalipay og dako sa 100 anyos nga lola, ingon man sa pamilya ug kabanay niini ang pasidungog nga nadawat isip ikalimang Centenarian Awardee sa siyudad sa Panabo.

Ang awardee mao si Remegia Bastasa, taga Purok 2, Barangay New Malitbog, siyudad sa Panabo.

Matud pa nga nadawat ni Bastasa ang pahalipay gikan sa lokal nga panggamhanan sa siyudad nga kantidad og P30,000 ug P100,000 gikan sa Department of Social Welfare and Development (DSWD) nga gitunol pinaagi ni Executive Secretary Josie Mary Relampagos, uban si City Councilor Flopone Royle Catalan nga maoy author sa Centenarian Ordinance sa siyudad.

Gibutyag nga ang pasidungog nahisubay sa Republic Act 10868 o Centenarians Act of 2016 kung diin nagtumong sa mga senior citizen nga makaabot sa edad nga usa ka gatos makadawat og cash incentive.

Gikinahanglan lamang mapakita ang birth certificate o marriage contract aron mapamatud-an nga nag-edad siya'g 100 anyos. (Dexter T. Visitacion)