KIDAPAWAN CITY -- Gipalig-on pa sa kapulisan ang seguridad karong summer vacation sa tibuok Soccsksargen.

Gibutyag ni Police Regional Office (PRO) Soccsksargen director Eliseo Tam Rasco nga magpakatag sila og napulo ka libo nga mga pulis ug mga force multipliers sa mga dapit nga hulga ang seguridad sa katawhan.

Mga pulis abagan sa unom ka libo nga mga miyembro sa Barangay Peacekeeping Action Team (BPAT), traffic enforcement units, security guards ug grupo sa mga volunteers.

Ipakatag ang mga nahisgutan sa mga simbahan, shopping malls, palengke, terminal, community centers, tourist destinations ug mga lugar nga daghang tawo.

Kini aron maseguro ang kahapsay ug kalinaw sa summer vacation ug uban nga aktibidad susama sa Semana Santa ug May 13 midterm election.

Segurado si Rasco nga modagsa ang mga tawo sa mga pista ug uban pang selebrasyon.

Tanan nga mga Police Station sa Rehiyon 12 adunay security plans ilawom sa “Ligtas Sumvac” o Summer Vacation 2019.

Gihangyo ni Rasco nga bisan andam na ang kapulisan batok sa mga hulga sa seguridad, kinahanglan gyud nila ang tabang sa publiko aron mapabilin ang kahapsay ug kalinaw sa Soccsksargen. (Edgar E. Fuerzas)