MABINI, Compostela Valley -- Gipangbalhog sa prisohan ug nakatakdang kasohan didto sa korte ang 11 ka mga lalaki kinsa giingong nagpailang mga empleyado sa Davao del Norte Electric Cooperative (Daneco), ubos sa Cooperative Development Authority (CDA), nga ilegal nga nag-estalar og kuryente sa usa ka konsumante nga naputlan didto sa Barangay Tagnanan Mabini alas 3:30 sa hapon niadtong, Agosto 30, 2019.

Subay sa spot report gikan sa Police Regional Office (PRO) Davao Region, ang mga dinakpan mao sila Breselo B. Veñares, 46, groundman; Ricky B. Peñas, 45, lineman; Rolando D. Manabat, 52, Task Force (TF) Daneco CDA; Rogelio A. Opao Sr., 56, TF Daneco CDA; Benjamin M. Tolibad, 63, TF Daneco CDA; Vernie P. Aurelio, 35, lineman; Bonifacio P. Mandawe, 28, lineman; Jimmy B. Magsanay, 40, TF Daneco CDA; Delfin Y. Tomaquin, 50, TF Daneco CDA; Manny A. Morata, 37, lineman; ug Gilmor M. Navarra, 31, meter inspector.

Sa imbestigasyon sa kapulisan, nasayran nga ilegal nga nipabalik og kuryente sa usa ka konsumante nga naputlan didto sa Mampising Carp Beneficiaries Coop (MCBC) sa Barangay Tagnanan.

Dihang usa ka positibo ug kasaligan nga impormasyon ang miabot sa kapulisan, gilusad dayon ang hiniusang operasyon sa kapulisan sa Mabini Municipal Police Station nga gipangunahan sa chief sa maong istasyon, Police Major Glyn Salubo, ug sa PRO-Davao.

Gilayong gipangposas sa kapulisan ang mga nahisgutan.

Nakuha sa posisyon sa mga suspetsado ang mga gamit sa pagpabalik sa kuryente ug ilang mga sling bag nga dunay usa ka gituohang kalibre .45 nga pistola, duha ka magazines sa nahisgutang armas, walo ka mga buhing bala nga gituohang gikan sa kalibre .45 nga pistola nga nakuha sa posisyon ni Rogelio A. Opao Sr., nga walay mga igong dokumento.

Sa pakighinabi kang Atty. Jorge Rapista, usa sa mga legal counsel sa Davao del Norte Electric Cooperative Inc. ubos sa National Electrification Administration, kasong kawat sa kuryente ubos sa Republic Act (RA) 7832, Anti-Pilferage Act ang kasong ipasaka batok sa mga suspetsado.

"They were caught in the act and we have evidence against them," sulti ni Rapista.

Kasohan sab ang mga suspek og kalapasan sa RA 10531 kun National Electricity Administration Reform Act ug RA 10591 kun Comprehensive Firearms and Ammunitions Regulation Act.

"Hinaut masabtan nato nga ang tanan ra gihapon ang gaantos sa matag kawat sa kuryente. Mas maayo gyud unta magtinabangay nga mapugngan ang kawat sa kuryente," sulti ni Engr. Emmanuel Galarse sa Daneco dihang nakahinabi sa mga tigbalita human sa operasyon sa awtoridad. (Jeepy P. Compio)