POSIBLENG gilugos ang 12-anyos una kini gipatay diin napalgan ang patay nga lawas sa biktima alas 11:30 Dominggo sa buntag, Disyembre 4, 2022 sa Purok 5, Sitio Malacombeng, Barangay Sibulan, Toril District, Davao City.

Kini ang gibutyag ni Davao City Spokesperson Police Major Catherine Dela Rey nga gituohang biktima sa lugos ang biktima, diin wa pay matumbok ang kapulisan nga suspek apan padayon kining giimbestigahan.

Nakitang wa nay kinabuhi ang biktima kilid sa usa ka creek sa maong lugar, kinsa adunay bun-og sa liog ug nakahubo na ang saplot niini sa ubos, nakita sab nga dunay dugo sa iyang kinatawo.

Sa pasiunang impormasyon, gibutyag ni Police Major Jonnel Bonguyan ang station commander sa Eden Police Station nga mitambong sa kasaulogan sa pista ang biktima ug nananghid sa iyang mga ginikanan nga didto matulog sa balay sa iyang apohan, adlaw'ng Sabado.

Dominggo sa buntag, milakaw ang biktima gikan sa balay sa iyang apohan aron mopauli, apan pipila ka oras napalgan nalang nga patay na ang 12-anyos mga 300-metros gikan sa balay sa iyang apohan, duna nay bun-og sa liog nga gituohang gituok.

Usa ka makuti nga imbestigasyon ang gihimo sa kapulisan sa Eden PNP diin ning pinakaulahing taho, duna nay mga person of interests ang mga pulis nga matudlong suspetsado.

Gilayong gidala sa Angel Funeral Home sa Toril ang patay'ng lawas sa biktima diin gipailawom sa otopsiya.

Sa pagsuwat ning balita kagahapon sa hapon, wala pa migawas ang resulta sa medico legal.