MATI CITY -- Mismong si Mayor Michelle Rabat ang madasigon nga nanguna atol sa inagurasyon sa Busog Lusog Talino (BLT) Kitchen didto sa Rabat-Rocamora Mati Central Elementary School niadtong Agusto 20, 2019.

Ang BLT Kitchen usa ka joint project sa Jollibee Group Foundation (JGF) ug sa Department of Education (DepEd) uban sa kooperasyon sa City Government of Mati.

Ang BLT Kitchen sa Mati maoy ika-33rd sa nasud ug ikatulo sa Davao region uban sa BLT kitchen sa Davao City ug sa Kapalong, Davao del Norte.

Sa tumong nga mas mapalapdan pa ang serbisyo ngadto sa katawhan ang JGF nagplano nga modugang pa og daghang BLT Kitchen sa Davao Oriental ug sa kinatibuk-ang rehiyon.

Ang BLT Kitchen sa Mati kasamtangang nagserbisyo sa 520 kabataang magtutungha sa walo ka nagkadaiyang mga tunghaan sa lugar.

Sa tibuok nasud, tumong sa BLT Kitchen nga matubag ang paniudto sa mga kabataang magtutungha sud sa 120 ka adlaw aron matabangan nga dili mamahimong ma-drop out ang estudyante gumikan sa kagutom ug aron madugangan ang paglambo sa ilang school performance.

Nagpasalig si Rabat nga mohatag siya og 100 porsyento nga suporta sa maong proyekto nga makatabang sa daghang magtutungha sa siyudad. (PR)