DIGOS CITY -- Mokabat sa 122 ka indibiduwal ang nasikop sa way puas nga implementasyon sa "Oplan Patagam" sa Digos City Police Station (DCPS) niadtong Lunes.

Sumala ni Lieutenant Colonel Vici Anthony Tababa, hepe sa DCPS, nga mas giistrikto nila ang implementasyon sa minimum health protocols aron mapugngan ang pagkuyanap sa coronavirus disease (Covid-19).

Giklaro ni Tababa nga human nipagawas og advisory guidelines number 21 si Mayor Josef Cagas, mas gihugtan nila ang pagpatuman sa Oplan Patagam aron makontrola ang local transmission sa Covid-19.

Sagad sa 122 nga nadakpan mao ang mga tawong wa mosul-ob og face mask, face shield, milapas sa social distancing ug curfew hours.

Sa bag-ong advisory sa City Inter-agency Task Force on Covid-19, magsugod ang curfew hours gikan alas 8 sa gabii hangtud alas 5 sa sayong kabuntagon.

Mihimo sab og rekorida ang kapulisan aron masayod ang publiko sa mga bag-ong polisiya sa dakbayan.

Nagpasidaan sab ang DCPS sa tanang establisemento nga di pasudlon ang mga tawong wa motuman sa tanang protocols ilabi na kung way face mask ug face shield.

Kinahanglan nga adunay mga sanitizers ang mga entradang bahin sa ilang agianan aron di molapas sa polisiya sa IATF. (Orlando B. Dinoy)