PERTENG lipaya sa 1,450 ka mga indibiduwal gikan sa tulo ka mga barangay sa ikaduhang distrito sa Davao City, kinsa nahimong benepisyaryo sa Assistance to Individuals in Crisis Situation (AICS) sa Department of Social Welfare and Development (DSWD) human sila nakadawat og tag P3,000 matag usa Huwebes, Hulyo 21, 2022, didto sa Ruiz Gym, Barangay San Antonio, ning dakbayan.

Ang mga benepisyaryo mao kadtong nawad-an og trabaho tungod sa kakulian sa coronavirus disease (Covid-19), mga mananagat, balo, solo parent, mga traysikad drayber, panday ug kadtong anaa sa walang-wala sa katilingban.

Gawas sa P3,000 nga salapi gikan sa DSWD, mitunol sab si Senator Christopher Lawrence "Bong" Go og mga food packs, medisina, mga computer tablets para sa pagtungha sa kabataan, sapatos ug dunay gipa-raffle nga mga bisikleta.

Perteng lipaya sa mga kapitan sa tulo ka barangay nga mao ang Barangay Ubalde, Barangay Rafael Castillo ug Barangay Lapulapu sa Agdao District gumikan sa serbisyo sa gobyerno nga ila gayod nga nasinati.

Sumala ni Go, kabahin kini sa serbisyo sa gobyerno nga alang gayod sa katawhan.

"Kini para ni sa inyo, gikan kini sa gobyerno, serbisyo kini ng ipabati gyod diha sa inyoha," tipik sa giingon ni Go.