MONKAYO, Compostela Valley Province -- Usa ka 16-anyos nga lalaki nga dunay kasong lugos ang gidakop sa mga pulis sa Purok 10, Barangay Poblacion alas 10:30 sa buntag, Biyernes, Septyembre 20.

Ang suspek giila nga si Dinjihon Macatual apan ang matuod niyang pangalan mao si Dinjohn Cabreros Macatual alyas Janjan, out of school youth ug molupyo sa Purok 8, Brgy. Poblacion.

Sa report nga nakuha gikan sa Compostela Valley Police Provincial Office, nasayran nga ang suspek nasikop pinaagi sa tracker team sa Monkayo Municipal Police Station atol sa gilusad nga Manhunt Charlie Operation sa maong dapit.

Ang pagkadakop kang Macatual subay sa warrant of arrest nga giisyo ni Presiding Judge Carmel G. Grado sa Regional Trial Court, 11th Judicial Region, Branch 56, Compostela, Comval tungod sa kasong lugos nga dunay criminal case number 449-2019 MNK/FC, pinetsahan Agosto 4, 2019.

Balor sa P120,000 ang girekomendang piyansa sa korte bugti sa temporaryong kagawasan sa suspek.

Samtang gisuwat ning balita, ang suspek anaa pa sa kustodiya sa Monkayo MPS. (Dexter T. Visitacion)