MAGUINDANAO PROVINCE -- Putol ang tuong paa sa usa ka 17-anyos nga bayong-bayong human maipit sa karnabal alas 8:50 sa gabii, Lunes, Marso 25.

Giila ang biktima nga si Benjie Jonjon Utak, assistant mechanic sa MNN Rides and Amusement ug molupyo sa Ipil, Zamboanga del Sur.

Matud ni Datu Odin Sinsuat chief of police Sabri Lakibul nga dunay giayo si Utak sa roller coaster sa karnabal sa Barangay Awang, Datu Odin Sinsuat, Maguindanao Province.

Apan aksidente nga naipit ang ulitawo sa roller coaster ug naputol ang paa.

Gihatud sa mga kaubanan ang biktima ngadto sa Cotabato Regional and Medical Center sa Cotabato City.

Samtang, mohimo og imbestigasyon ang Department of Labor and Employment-Maguindanao nganong dunay menor de edad nga trabante sa maong karnabal.

Hinuon, giduphan sa tag-iya sa MNN Rides and Amusement ang galastusan sa balay tambalanan sa batan-on. (Edgar E. Fuerzas)