PANTUKAN, Comval Province -- Malampuson nga naaresto sa kapulisan ang usa ka mag-uuma nga pinangita sa balaod sa Barangay Tag-ugpo, alas 3 sa hapon, Miyerkules, Pebrero 6.

Dinakpan giila nga mao si Crisanto Mollez Logronio, 32, nagpuyo sa Barangay Tag-ugpo, Pantukan.

Sa interbyu sa SuperBalita, gibutyag ni Police Chief Inspector Jerry Cabag, hepe sa Pantukan Municipal Police Station, nga nakig-alayon ang iyang buhatan sa 1101st Maneuver Company, 11th Regional Mobile Force Company sa pagsilbi sa orden de aresto batok sa suspek.

Gidason sa hepe nga human sa sagunson nga intelligence operation sa ilang buhatan gilayong gisilbi ang orden de aresto batok sa suspek.

Ang suspek dunay warrant of arrest sa kasong rape o pagpanglugos ubos sa Criminal Case Number FC-322.

Ang orden de aresto gipagula ni Acting Provincial Judge Oscar Tirol, Regional Trial Court, Branch 3, Nabunturan.

Ang suspek giilang Top 10 Wanted Person sa Pantukan.

Gibutyag sa hepe nga dul-an na sa 17 ka tuig nga nagtago-tago ang suspek.

Ang dinakpan gikustodiya sa kapulisan samtang naghulat sa mosunod nga mando sa korte.