MIABOT na og 19 ka mga tawo ang namatay sa gikalisangang sakit nga coronavirus disease 2019 (Covid-19) sa lungsod sa Compostela, Davao de Oro.

Kini ang gibutyag sa lokal nga panggamhanan sa lungsod subay sa natala sa ilang opisyal Facebook page Hunyo 17, 2021.

Matud pa nga ang pasyente nga bag-o lang namatay, usa ka babaye nga nag-edad og 36-anyos nga taga Barangay Mapaca.

Giingong nga na-admit kini sa Davao De Oro Provincial Hospital-Montevista ug mipanaw niadtong Hunyo 16, 2021.

Gibutyag nga ang maong pasyente gi-swab test sa samang adlaw ug migawas ang resulta, Hunyo 17, 2021, nga siya positibo sa virus.

Ang pasyente mao sab ang ika-351 nga nagpositibo sa sakit sa Covid-19 sa lungsod.

Sa kasamtangan, ang lungsod sa Compostela dunay 105 ka mga aktibong kaso, 19 ang namatay ug 227 ang nakarekober. (Dexter T. Visitacion)