DAVAO DEL NORTE -- Nagsubo ang pamilya ug kabanay sa duha ka tuig nga batang lalaki nga napalgang patay samtang naglutaw sa kanal sa National Irrigation Administration (NIA) sa Purok 5-B, Barangay Braulio E. Dujali, alas 8 sa buntag niadtong Sabado, Pebrero 22, 2020.

Ang biktima giila nga si Qaint Francisco Eziekiel B. Capilitan, 2-anyos, molupyo sa Purok 1 sa nasampit nga dapit.

Base sa inisyal nga imbestigasyon, nga niadtong adlaw’ng Biyernes, Pebrero 21, 2020, si Rosalie Batugan Espanola, 42-anyos, minyo nga taga Purok 1, ang midangat sa B.E Dujali Municipal Police Station ug mitaho nga ang nahisgutang biktima nawala.

Gikabutyag nga pagka adlaw’ng Sabado, adunay usa ka patay’ng lawas ang napalgang naglutaw sa kanal sa NIA sa Purok 5-B.

Diha dayon, giila ni Barangay Konsehal Dirk Donasco ang maong patay’ng lawas nga mao ang nawala nga si Qaint Francisco Eziekiel B. Capilitan.

Ning kasamtangan ang patay nga lawas sa biktima gihaya na sa iyang pamilya samtang ang kapulisan padayong naghimo og imbestigasyon sa hitabo.