TUNGOD sa 'chikinini' duha ka mga babaye ang nagbugno Dominggo sa buntag didto sa Cabaguio Avenue, Davao City ug gipangdala sa Sta. Ana Police Station aron sila mahusay.

Sumala sa report, miadto si alyas Inday, 25-anyos, dunay kapuyo, taga Jerome, Agdao District Davao City sa gitrabahoan sa live-in-partner niini sa dalang Cabaguio.

Pag-abot sa lugar nakit-an niini nga dunay 'chikinini' ang liog sa iyang kapuyo, maong iya kining gikompronta.

Dihang iyang gipangutana ang iyang kapuyo labot sa chikinini, kalit na lamang usa ka alyas Babes, ang misagbat kinsa kauban sa trabahoan ug miangkon nga siya ang mihimo sa chikinini.

Gumikan sa hitabo, nagkainitay ang duha ka babaye ug miresulta sa pagdinumogay atubangan mismo sa lalaki.

Daling giulang sa mga tawo ang duha ug gipangdala sa istasyon sa kapulisan aron husayon ug ipatala ang panghitabo.

Gitambagan sa kapulisan ang duha ka babaye nga magpa-ospital gumikan sa mga bun-og nga ilang nahiagoman ug gipahandos ang ilang reklamo didto sa barangay aron didto sila husayon.

Nasayran nga kabit diay sa lalaki si Babes kinsa seksi kaayong miadto sa Sta. Ana PNP ug maoy hinungdan nga magduha na ka semanang wala miuli ang lalaki ngadto sa iyang kapuyo.