DAVAO DEL NORTE -- Nagbangutan ang pamilya sa duha ka mga batan-on nga namatay samtang naligo sa Macgum River duol sa Dampinas Bridge sa Purok 9, Barangay Sanion, Asuncion, Lunes sa alas 11:25 sa buntag, Hunyo 29, 2020.

Ang mga biktima giila nga sila si Julius Banol, 17, laborer, molupyo sa Purok 1, Barangay San Roque, New Corella; ug John Louie, 14, laborer nga taga Purok 2, Barangay Limbaan, New Corella.

Subay sa report, base sa pamahayag sa igsuon sa namatay nga si Julius nga ang mga biktima naligo sa sapa kauban sa lain pa nilang mga higala.

Matud pa nga si Julius, misalom sa lawom nga bahin sa sapa apan wa madugay nangayo og panabang hinungdan nga dayong gitabang sa higalang si John Louie apan silang duha nalumos.

Gidali pagdala ang mga biktima sa Kapalong Emergency Hospital apan gideklarang dead on arrival sa doktor nga miatiman.

Ang patay'ng lawas sa mga biktima gihaya sa tagsa-tagsa nila ka panimalay.