DAVAO DE ORO -- Duha ka mga empleyado sa Department of Public Works and Highways (DPWH)-Davao De Oro ang bag-ong nataptan sa CoronaVirus Disease (Covid-19).

Gibutyag nga Oktubre 23, 2020 natala sa Planning and Design Section sa DPWH-DdO ang maong duha ka kaso.

Matud pa nga ang mga pasyente pulos trabahante sa nahisgutang ahensya nga diin ang unang nagpositibo usa ka 33-anyos nga lalaki nga molupyo sa Visayan Village, siyudad sa Tagum samtang ang ikaduha usa ka 51-anyos nga lalaki nga taga Daneco Village, Magugpo siyudad sa Tagum nga kasamtangang nag-arkila og pinuy-anan sa Barangay Sta Maria, Nabunturan.

Sumala pa nga parehong symptomatic o adunay mga gipamati nga sintomas sa Covid-19 ang maong duha ka mga pasyente.

Tungod sa maong hitabo, ang mga tawo nga nakasulod o adunay transaksyon sa DPWH-DdO sugod Septyembre 30 hangtod Oktubre 22 gipahimangnoan nga mag-self quarantine diin kung dunay gipamati nga sintomas mutawag dayon sa lokal IATF hotlines o sa Nabunturan Covid-19 Hotlines 0961-114-9253 ug sa 0915-679-6427. (DTV)