BIKTIMA sa summary execution ang duha ka tawo nga nabangalan alas 2:00 sa kaadlawon, Sabado, Septyembre 10, 2022, sa probinsiya sa Maguindanao.

Mga biktima giila nga sila Norodin Manalaguia Buisan, 29, ug Bila Labaya Datu Maidto, 21, mga molupyo sa Kabacan, Cotabato Province.

Matud ni Datu Montawal Chief of Police Lieutenant Nurjhasier Sali nga nakabati og sunod-sunod nga buto sa mga armas ang mga nagpuyo kilid sa national highway sa Barangay Bulit, Datu Montawal, Maguindanao Province kon diin dunay nakit-ang nibiya nga wala matino nga matang sa sakyanan sa dapit.

Sa pagresponde sa kapulisan ug sa mga sakop sa Barangay Peacekeeping Action Team (BPAT), ilang napalgan ang mga lawas sa mga biktima nga nagbuy-od daplin sa national highway nga dunay daghang samad sa bala sa nagkalaing bahin sa lawas.

Samtang, hustisya karon ang singgit sa pamilya sa mga biktima nga niluog nga gipangpatay.

Blangko pa ang kapulisan sa Datu Montawal Municipal Police Station sa motibo sa pagpatay sa mga biktima ug padayon pa ang ilang imbestigasyon.