NANUKOL hinungdan nga nabugha ang duha ka lalaki samtang laing duha sab ang nadakpan sa gilusad nga law enforcement operation alas 4:30 sa kaadlawon Biyernes, Mayo 20, 2022, sa Pigcawayan, Cotabato Province.

Giila ang mga napatay nga sila Datu Romah Malang Mastura alyas Mamako ug Ebrahim Samama. Samtang ang mga nadakpan mao sila Guiahed Akmad Toting, 24, ug Ali Kamsa Guilay, 24, pulos molupyo sa Sitio Calumpangan, Barangay Balacayon, Pigcawayan.

Gibutyag ni 6th Infantry (Kampilan) Division Chief ug Joint Task Force Central Commander Major/General Juvymax Uy nga nilusad sila og law enforcement operation, uban ang kapulisan, lakip na ang mga sakop sa Philippine Drug Enforcement Agency (PDEA)-Soccsksargen batok sa grupo ni alyas Ebs.

Apan pasulod pa lang ang raiding team sa target, nagpungasi na ang mga bala gikan sa mga suspek nga maoy hinungdan sa lima ka minutos nga pinusilay hinungdan sa pagkamatay sa duha ka suspek ug pagkasikop sa laing duha pa. Apan si alyas Ebs nakaipsot sa nahisgutang operasyon.

Narekober sa mga awtoridad gikan sa posisyon sa mga suspek ang duha ka M16 Armalite rifles, usa ka M14 rifle, 2 kalibre .45 nga pistola, mga magazines sa bala ug mga assorted war materials.

Nakuha sab sa gitagoan sa mga suspek ang unom ka pakite sa shabu ug mga drug paraphernalia.

Sumala pa nga mga suspek apil sa mga mipuga sa Cotabato Police Provincial Office niadtong 2017 nga giingong tigsuplay na og mga armas ug uban pang kagamitan ngadto sa Bangsamoro Islamic Freedom Fighters ug Dawlah Islamiyah Terror Group.

Sa pagsuwat ning balita Biyernes, gilutos na sa Joint Task Force Central ug kapulisan si alyas Ebs.