DUHA ka mga tawo ang nadakpan sa mga sakop sa Criminal Investigation and Detection Group, Davao City Field Unit, atol sa gipahigayon nga pagpatuman sa search warrant sa duha ka managlahing lugar sa distrito sa Calinan.

Ang duha ka search warrant gipatuman sa Brgy. Talomo River, Calinan District, Davao City ug sa Ramon Magsasay Street, Brgy. Calinan Poblacion, Calinan District, ning dakbayan.

Malampusong nasikop sila Phel Villaber Estigos, dunay search warrant number 2056, residente sa Brgy. Talomo River, ug usa ka Anthony Gozo Pantinople, dunay search warrant number 2057, nagpuyo sa Ramon Magsasay Street.

Mga pusil ug bala ang nakuha sa posisyon sa mga dinakpan nga maoy himuong ededensya batok kanila didto sa korte.

Nasayran nga ang duha giingong sakop sa Avila Criminal Gang nga nalambigit sa pagpamaligya og armas ug ilegal nga druga sa Calinan ug uban pang lugar.

Priso karon ang duha samtang mag-atubang og kaso subay sa salaod nga ilang nahimo. (Richy F. Nalagon)