KIDAPAWAN CITY - Sad-an sa kaso nga cyber libel ang duha ka sakop sa media sa Kidapawan City.

Giila ang mga suspek nga sila si Eric Rodinas alyas Sherwin Dugaduga sa Radyo Natin Kidapawan City ug Larry Subillaga, freelance journalist.

Napamatud-an sa pagtaral ni RTC-12 Branch 23 Judge Jose Tabosares nga sal-an sila Rodinas ug Subillaga hinungdan nga gipakanaog niini ang desisyon nga mapreso og upat hangtud walo ka tuig ang duruha.

Mobayad sab sila og tag P2.5 milyon matag usa nila Rodinas ug Subillaga bayad sa damyos perwisyo sa korte sa kaso nga gisang-at ni Cotabato Governor Emmylou “Lala” Taliño Mendoza.

Nag-ugat ang kaso nila Rodinas ug Subillaga gumikan sa mga malisyoso nga post niini sa Facebook batok kang Governor Mendoza.

Niadtong tuig 2017 hangtud 2018 adlaw adlaw nga giatake ni Rodinas sa Radyo og post sa social media ni Subillaga batok kang Mendoza.

Napakyas sab ang duruha nga kuhaon ang tubag ni Mendoza nga miresulta sa personal nga pagpangatake og walay legal nga basihan.

Gumikan sa gipresenta nga mga testigo og ebedensiya sa gobernadora batok kang Rodinas ug Subillaga guilty ang gipahamtang nga desisyon ni Judge Tabosares.

Gikanayon sab sa duha ka sakop sa media nga andam nila nga i-apela sa taas nga lebel sa korte ang desisyon ni Judge Tabosares gumikan wala silay sala ug igo lamang nila nga gipagawas ang kamatuoran batok kang Mendoza. (Edgar Fuerzas)