DUHA ka mga lalaki nga gituohang mga biyahedor og ilegal nga druga ang nasikop sa kapulisan atol sa pagrekisa sa Task Force (TF) Davao sa checkpoint sa Sirawan, Toril, Davao City ug sa drug bust sa Sta. Ana Police Station, Biyernes, Disyembre 14.

Ang nasikop sa TF-Davao ug Toril PNP giilang si Gerald Joy Pontillano, 34, taga Digos City samtang sikop sa Sta. Ana PNP ang usa ka Ninio Ruzzele Agustin, 26, taga Davao City.

Dihang girekisa sa TF-Davao ang bag ni Pontillano, nakuha ang dagko nga pakite sa gituohang shabu nga mokantidad og P280 mil samtang mokabat sa P10 mil nga shabu ang nakumpiska sa posisyon ni Agustin atol sa drugbust.

Sumala sa mga dinakpan nga wala sila magdahom nga masikop sila sa otoridad ug ilang giangkon nga nahimo nila kini aron naa sila'y panggasto sa Pasko ug sa Bag-ong Tuig.

Gibutyag sab sa otoridad nga notadong biyahedor og shabu si Pontillano gikan Digos City padung Davao City, apan karon lamang kini nasikop, samtang notado sab si Agustin sa ilang dapit.

Nanganti ang otoridad nga di gayud kalusot kanila ang si bisan kinsa man nga mga tawo nga magdala og ilegal nga druga sa siyudad.

Hugot sab ang monitoring sa matag istasyon sa kapulisan sa Davao sa ilang matag area of responsibility gumikan lagmit duna gayo'y mamaligya og ilegal nga druga niining hinangat ang pagsaulog sa Pasko ug pagsugat sa Bag-ong Tuig.

Giandam na ang kasong pagsupak sa Republic Act 9165 kon Comprehensive Dangerous Drugs Act of 2002 batok sa duha ka dinakpan didto sa korte.