DUNAY tattoo nga dahon sa marijuana ang usa ka lalaki nga namatay sa natigayong pagpamusil sa area of responsibility (AOR) sa San Pedro Police Station alas 11:20 gabii, Nobiyembre 24, 2022, didto sa corner Padre Gomez ug Mabini Street, Barangay 33-D, Davao City.

Sumala ni Police Major Marvin Hugos, station commander sa San Pedro Police Station 2, nagbutyag nga atol sa pagpamusil, wala dayon nailhan ang mga biktima sanglit walay mga identification cards ang nakuha sa ilang posisyon.

Nasayran nga usa ang dead on the spot ang may tattoo sa kamot nga korte sa dahon sa marijuana ug duna sab sa dughan, gibanabana kini nga nagpangedaron og 20-anyos.

Ang usa kritikal kinsa anaa sa Southern Philippines Medical Center nga gibanabana nga anaa sa 19-anyos kinsa nakasuot og puti nga t-shirt.

Migula sa inisyal nga imbestigasyon sa kapulisan nga samtang naglakaw ang duha sa maong lugar, kalit silang gipamusil sa wa mailhing mamumuno gamit ang wala matino nga kalibre sa armas.

Padayon ang kapulisan sa pag-imbestiga sa motibo sa krimen ug aron maila ug madakpan ang mga responsable.