DALI nga na-rescue sa kapulisan sa Buhangin Police Station ang duha ka menor de edad kinsa maoy kauban sa 18-anyos nga pusher atol sa buy-bust operation sa mga pulis, didto sa Kilometro 5, Buhangin Davao City, adlaw nga Lunes.

Sa impormasyon nga gipadala sa Police Regional Office (PRO)-Davao, giila ang dinakpan nga usa ka Angelo Yangwas Bautista, alyas Long-Long, 18-anyos, samtang ang mga kauban niini usa ka 14-anyos ug 17-anyos.

Narekober gikan sa ilang posisyon ang usa ka dako ug tulo ka gamay nga pakete sa gituohang shabu, ug duha ka linikit sa pinaugang dahon sa marijuana nga dunay street value nga P500.

Giingon nga dugay nang gi-monitor ang lihok sa suspek ug higayon nga mibaligya kini og droga sa otoridad.

Ang nasampit nga mga menor ihandos sa pulis didto sa buhatan sa City Social Services and Development Office aron mapatawag ang ilang mga ginikanan. (Jeepy P. Compio)