GIKASOHAN na og murder didto sa Provincial Prosecutor’s Office ang duha ka mga batan-on nga brutal nga mipatay sa 27-anyos nga lalaki sa Quezon Street, Barangay Poblacion, Lupon, Davao Oriental.

Subay sa report sa Police Regional Office (PRO)-Davao, ang kaso sa duha ka suspek nakadokit sa NPS-XI-05b-INQ-21K-0169 nga nakapetsa Nobyembre 22, 2021.

Luyo sa pagpasaka og kaso, nag-agad gihapon ang kapulisan sa Lupon Municipal Police Station labot sa hisgutanan nga discernment sa Department of Social Welfare and Development (DSWD) sa mga Children in Conflict with the Law (CICL) sanglit mga menor de edad ang mga suspek.

Bisan pa og napasakaan na og kaso, grabe gihapon ang pagsubo sa mga kabanay sa biktimang si Vincent Almeda Sumaoy, alyas Enteng, taga NHA, Barangay San Antonio, Davao City.

Si Sumaoy gideklara nga patay na pag-abot sa ospital sa attending physician nga si Dra. Aiza Gabring sa Davao Regional Medical Center (DRMC) sa Tagum City.

Human sa hitabo nasikop ang mga suspek sa Barangay Mahayag sa munisipalidad sa Lupon human sa ilang brutal nga pagpatay sa biktima gamit ang ice pick ug sundang.

Nasayran nga ang biktima miduyog sa birthday sa iyang ig-agaw sa Lupon diin sa tugkaran giingong nag-vape ang biktima.

Nasayran nga naasohan ang duha ka suspek diin nangasuko ug gilayong gidunggab ang biktima og ice pick. Wala pa sila nakontento ila pa kining gitigbas dayon nanagan.

Nakapangayo pa og pakitabang ang biktima sa ilang kabanay apan taud-taod mabugtoan na kini sa kinabuhi.

Sa kasamtangan, ang duha ka menor de edad anaa sa pagkustodiya sa Women and Children Protection Desk sa Lupon police, samtang ang patay nga lawas sa biktima anaa na gihaya sa ilang panimalay.