KIDAPAWAN CITY -- Duha ka menor de edad nga nadakpan sa mga awtoridad niadtong Dominggo, Agosto 11, giingong miyembro sa dakong grupo sa sindikato nga tigpangawat og motorsiklo sa probinsiya sa North Cotabato.

Kini base sa gihimong imbestigasyon sa M’lang Municipal Police Station human mga menor nadakpan alas 4 sa hapon sa maong adlaw.

Nagpangedaron pa lang og 17 ug 12-anyos ang mga suspek hinungdan nga wala sila hinganli sa kapulisan ngadto sa mga tigbalita.

Sa taho gikan sa M’lang MPS, nasayran nga nakadawat ang mga pulis og impormasyon sa presensiya sa duha ka menor nga matud pa motornapper sa Purok 6A, New Antique, M’lang nga abtik nilang girespondehan hinungdan nga nadakpan.

Narekober sa kapulisan gikan sa mga suspek ang ilang kinawat nga motor nga gipanag-iyahan ni Ronilo Guillermo.

Matud ni Guillermo nga iya lang giparking ang motor duol sa iyang balay sa diha nga gikawat sa mga suspek.

Nasayran matud pa nga kapila na kahigayon nga nadakpan ang mga suspek sa kasong pagpangawat og motor ug gitunol ngadto sa Department of Social Welfare and Development apan nakagawas sa pasalig sa ginikanan nga sila disiplinahon.

Padayon ang gihimong imbestigasyon sa mga awtoridad aron masubay ang giingong sindikato nga nagapangawat og motorsiklo sa probinsiya.