NALUWAS na man unta sila sa kalit nga pagbaha sa ilang gipuy-an apan nakuryentihan gihapon ang duha ka tawo alas 3:45 sa hapon niadtong Martes, Nobiyembre 29, 2022, sa usa ka barangay sa Alamada, Cotabato Province.

Mga namatay giilang sila Muhaymin Madaya, 26, ug Ivan Akwa, 16, mga molupyo sa Barangay Polayagan sa nahisgutang lungsod.

Gibutyag ni Cotabato Provincial Police Director Colonel Harold Ramos nga mibundak ang makusog nga ulan sa maong barangay dungan sa daw bagyo nga hangin.

Taud-taod lang ang milabay, mibul-og na ang dakong baha sa Alamada River, hinungdan nga mihikling ang mga biktima paingon sa taas nga bahin.

Apan, wala damha sa magsilingang biktima nga makuryentihan sa buhing linya sa Cotabato Electric Cooperative Inc.-Ppalma nga misayad sa tubig-baha.

Nadala pa unta sila ngadto sa Alamada District Hospital apan pulos gihapon namatay.

Samtang nagpaabot gilayon og hinabang si Cotabato Governor Emmylou "Lala" Taliño-Mendoza ngadto sa mga pamilya sa biktima pinaagi sa buhatan sa Provincial Social Welfare and Development Office uban ang Department of Social Welfare and Development Crisis Intervention Unit.