NAGBANGOTAN karon ang Archdiocese of Cotabato sa kamatayon sa duha ka pari niadtong adlaw nga Sabado, Mayo 22, 2021, sa Siyudad sa Cotabato tungod matud pa sa coronavirus disease 2019 (Covid-19).

Ang unang pari nga namatay nagpangedaron og 78 anyos sulod sa Cotabato Regional and Medical Center.

Sumala pa, pamunoan sa Archdiocese of Cotabato nga duha ka semana siyang naospital gumikan sa komplikasyon sa iyang sakit hangtud nga nataptan sa Covid-19.

Ang nahisgutang pari nadestino na sa nagkadaiyang parokya sa dayosis sa Cotabato ug nahimong rector sa seminaryo.

Samtang, ang ikaduhang pari nagpangedaron og 62 anyos nga giingong namatay gihapon sulod sa balay tambalanan tungod sa Covid-19.

Nanawagan karon og pag-ampo ang kaparian sa Archdiocese of Cotabato sa duha nila ka mga kaubanan sa ministriya ug miapela ngadto sa publiko nga seryusohon ang pag-amping batok sa Covid-19.