KIDAPAWAN CITY -- Duha ka security guard ang gipamusil-patay sa managlahing dapit alas 7:15 sa gabii niadtong Sabado sa probinsya sa Cotabato.

Unang biktima mao si Arthur Masanit, 42-anyos ug nagpuyo sa Purok Talisay, Barangay Dalapitan, Matalam North Cotabato.

Sa taho gikan sa kapulisan sa Matalam nga nagtindog lamang ang biktima duol sa iyang gi-trabahoan sa Purok Everlasting, Brgy. Sta Maria Matalam sa diha nga kalit siyang giduol sa duha ka wala mailhing tawo ug gipusil gamit ang kalibre .45 nga pistola.

Abtik sab nga miikyas ang mga namusil sakay sa motorsiklo paingon sa hilit nga dapit sa Matalam.

Dead on the spot ang biktima nga naigo sa iyang ulo ug dughan nga parte sa lawas.

Ikaduha nga sekyu nga gitipi mao si Butsoy Nioda nga naglingkod lamang sa waiting shed sa Barangay Poblacion, Makilala North Cotabato sa diha nga gipikhan kini sa riding-in-tandem gamit ang kalibre .45 nga pistola.

Patay gilayon ang biktima nga naigo sa iyang ulo diin dali sab nga miikyas ang mga suspetsado.

Sa kasamtangan ang kapulisan sa probinsya sa Cotabato ang padayon nga nag-imbestiga sa pagpamusil-patay sa duha ka sekyu. (Edgar Fuerzas)