PADAYON karong gisusi sa mga awtoridad ang pagpatay sa duha ka mga tawo nga nakaplagang gilabay alas 5:40 sa buntag, Miyerkules, Oktubre 21, didto sa Purok 6, Barangay Nueva Vida, M'lang, North Cotabato.

Sumala kang North Cotabato Police Provincial Office Director Colonel Henry Villar nga nasiplatan sa mga sibilyan ang mga patay'ng lawas sa mga biktima daplin sa national highway nga dali sab dayon nilang gitaho ngadto sa kapulisan sa M'lang Municipal Police Station.

Gihulagway nga pulos nakaangkon og daghang samad dinunggaban ang mga biktima sa ilang likod ug dughan nga giputos pa og masking tape ang mga nawong ug gigapos ang mga tiil, lakip na mga kamot.

Gibanabana nga naa sa pangedaron nga 25 hangtud 30 ang mga biktima, naka-polo shirt, naka-jacket, nagsul-ob lang og short pants.

Daghan ang nagtuo nga posibleng gipatay ang mga biktima sa laing dapit ug gilabay lang sa nahisgutang lugar. (Edgar E. Fuerzas)