SIKOP ug posibleng matanggal sa serbisyo ang duha ka traffic enforcer human alegasyong nangilkil sa usa ka pulis nga nagpakaaron-ingnon nga drayber, atol sa gipahigayon nga entrapment operation Lunes sa dalang Quimpo Boulevard, dakbayan sa Davao.

Giila ang mga dinakpan nga sila Eric Yagao Villanueva, 44, residente sa Barangay Mintal ug si Leodigario Ongyot Zagado, 45, residente sa Ulas, ning siyudad.

Una ang insidente, usa ka pulis nag-drive sa van ug nagtuyok-tuyok sa Quimpo Boulevard Lunes sa buntag, Marso 25.

Gilayon kining gipara sa traffic enforcer nga si Villanueva ug giingnan nga nakalapas sa over speeding base sa ilang nakita gamit ang speed gun.

Sa pag-istorya sa traffic enforcer ug sa nagtakuban nga pulis, nasayran nga gi-areglo sa traffic enforcer ang maong salaud basta mobayad ang drayber og P500 isip areglo.

Gilayon nga gitunol sa drayber ang marked money dayon giposasan si Villanueva ug kauban niini nga si Zagado.

Sumala ni Ret. Police Superintendent Dionisio Abude, hepe sa City Transport and Traffic Management Office (CTTMO), nga nakigkoordinar kaniya ang kapulisan una pa man ang operasyon, kalabot sa maong hiwi nga binuhatan sa iyang mga sakop.

Sa pagkadakop sa duha, gipasalig ni Abude nga tanggalon sa serbisyo ang mga nahisgutan ug ang nahitabo kanila magsilbi nga leksyon sa uban pa nga mga traffic enforcers nga kinahanglan mohimo gayod og tinud-anay nga serbisyo sa katawhan ug likayan ang dautang hinimoan. (Richy F. Nalagon)