MITALA ang Davao City Veterinarian’s Office og 20 porsiyento lang sa 2,520 nga gidakop nga mga iro ang gipanguha gikan Enero hangtud Septyembre 2018, ug ang uban gipailawom sa “euthanasia.”

“More or less, 20 percent lang ang na-claim, so ang uban euthanized. Gamay ra gyud ang naga-claim kay usually mga stray dogs man gyud ang madakpan,” pagklaro ni Dr. Gay Pallar, nangulo sa Animal Disease Prevention and Control Section, Huwebes, Oktubre 18.

Niadtong milabay nga tuig, dunay 3,225 ang nadakpan nga mga iro kon diin kapin kun kulang 20 porsiyento gikuha sab ug ang uban gi-“euthanize.”

Samtang gisulti ni Pallar ang nadakpan nga mga iro nga gipanguha human ang tulo ka adlaw gihatagan og libreng rabies vaccines, nga dunay igong suplay hangtud sa katapusan ning tuiga.

Apan gitin-aw ni Pallar nga dunay kakuwang sa suplay sa human rabies vaccines sa tibuok kalibutan tungod sa iyang produksiyon.

“Mao na ang concentration, naa sa mga iro ug mga iring. Actually, naa tay simultaneous nga schedule kung asa ang concentration sa bakuna,” pagseguro ni Pallar.

Apan iyang giklaro nga ang mga kaso sa rabies sa dakbayan karon di makaalarma tungod sa kanunay nga information education campaign (IEC) nga magbukas og “awareness” ngadto sa Davaoeños.

“Ang IEC against rabies simultaneous man na siya,” pahibawo niya diin prayoridad niini mao ang mga rural areas ug mga barangays. (LHC)