MADASIGON ang 24 ka pares nga magtiayon atol sa ilang kasal nga gitambungan ni Davao City Acting Mayor Sebastian Baste Duterte sa gihimo nga Kasalan ng Barangay, Huwebes sa hapon, Mayo 26, 2022, didto sa Barangay Sumimao, Paquibato District, Davao City.

Mismong ang umaabot nga mayor sa siyudad ang mikasal uban nila ni Second District Councilor Atty. Diosdado Mahipus Jr., Barangay Captain Bebot Niño ug Barangay Captain Jessie Areja.

Sa seremonya, mihatag og mensahe ang incoming mayor ngadto sa bag-ong mga magtiayon nga kinahanglan ipakita ang pagsinabtanay diha sulod sa pamilya alang sa malinawon nga komunidad.

Dugang ni Baste nga usa kini ka dako ug abli nga oportunidad gikan sa serbisyo sa gobyerno alang sa tanang mga Dabawenyo nga wala nakasal.

Dako usab ang pasalamat sa mga bag-ong magtiayon nga bisan pa man sa hilit nila nga dapit, naabot gayod ang serbisyo sa kagamhanang lokal ning siyudad ngadto kanila.

Mga bag-ong kinasal nakadawat og salapi ug regalo gikan sa LGU ning siyudad isip sugod diha sa kinabuhing legal nga kaminyuon.