MAGSAYSAY, Davao del Sur -- Hingpit nang gitunol sa National Housing Authority (NHA) ang 240 ka mga housing units ngadto sa mga biktima sa linog niadtong 2019 didto sa Tagaytay relocation site nga giplastar sa Barangay Balnate niadtong Lunes sa hapon, Mayo 17.

Wala makaabot si Senator Bong Go sa ceremonial turnover apan usa ka video message ang gipadala niini aron mapaminaw sa mga benepisyaryo ang iyang mensahe kanila.

Sa maong video, misaad si Go nga padayon sila ni Presidente Rodrigo Duterte nga moserbisyo sa katawhan sanglit usa sab kini ka pag-serbisyo sa Diyos.

Hinuon, nakatambong si National Housing Authority General Manager Marcelino Escalada diin nanguna sa programa ug misaad nga magtukod sab ang ahensiya og wet market sa lugar aron adunay panginabuhian ang katawhan.

Dako sab ang pasalamat ni Mayor Arthur Davin ngadto sa administrasyong Duterte, Go ug Escalada tungod sa paspas nga pagbangon sa ilang lungsod gikan sa kabangis sa kalamidad.

Giawhag ni Davin ang mga residente nga dili mohimo og ekstensyon sa ilang mga balay aron di maguba ang nindot nga porma niini ilabi na nga magbutang pa sila og mga drainage canal ug gymnasium sa lugar.

Nasayran nga ang maong relocation site sa Tagaytay maoy pinakadako nga lugar alang sa mga nawad-an og balay panahon sa kusog nga sagunsong linog.

Anaa sa 258 ang mga nawad-an og kapuy-an sa Brgy. Tagaytay apan dili na maakomodar ang 18 kanila mao nga gitukuran kini og balay sa laing relocation site.

Gawas sa nadawat nga housing unit, mitunol sab ang Department of Social Welfare and Development og kantidad P3,000 isip financial assistance sa mga benepisyaryo.

Nagpadala sab og mga tambal si Go alang sa mga benepisyaryo. (Orlando B. Dinoy)