PATAY ang 3-anyos nga batang lalaki nga nahagbong ug nalumos sa kanal sa National Irrigation Administration (NIA) sa Purok Magsaysay, Lunga-og, Sto. Tomas, Davao del Norte.

Giila ang biktima nga si Marcelo Degarcia Respecio, 3-anyos ug molupyo sa nahisgutang dapit.

Subay sa report, ang biktima wa mabantayi nga miadto sa kanal sa NIA kinsa misubay sa danlog nga dalan gumikan sa ulan ug aksidenteng nahagbong ug nalumos.

Gibutyag nga sa pagkahitabo ang inahan nga si Ligaya Parenas Degarcua milakaw kay matud pa nangita og kwarta diin sa iyang pag-uli mao na lamang ang misugat kaniya diin ang anak naglutaw sa kanal.

Matud pa nga gidali og tabang ang bata ug gidala sa Bungabong Sanico Hospital sa pamasin nga masalbar pa ang kinabuhi apan, gideklara kining dead on arrival.

Nag-inusarang anak sa iyang ginikanan ang biktima hinungdan nga labihan ang pagmahay nga gibati sa amahan ug inahan.

Ang patay’ng lawas sa biktima gipahiluna sa usa sa mga punerarya sa lungsod.