KASONG pagsupak sa Republic Act 9165 kun Comprehensive Dangerous Drug Act of 2002 ang ipasaka batok sa tulo ka mga babaye nga nalit-ag sa kapulisan sa Sasa Police Station atol sa gihimong drug bust alas 4:30 sa hapon niadtong Biyernes, Enero 3 didto sa Kilometro 9, Coaco Road, Barangay Pampanga, Davao City.

Ang operasyon miresulta sa pagkasikop nila alyas Lalay, 18-anyos; alyas Ara, 25-anyos; ug alyas Gege, 18-anyos, diin pulos nagpuyo sa Boulevard, Davao City.

Sumala sa kapulisan sa Sasa PNP nga dugay na nilang gipanid-an ang ilegal nga lihok sa mga nahisgutan ug misangko sa paglusad na sa anti-illegal drugs operation.

Nakuha sa ilang posisyon ang mga pakite sa gituohang “shabu” nga mokantidad og P10,000, cellphone ug drug bust money.

Butyag sa mga dinakpan nga igo lamang sila nagdala sa gisugo kanila, aron maka-porsiyento.

Hinuon ilang giangkon nga mogamit sab sila, apan ang pagbaligya og binulto nga shabu wala suma pa nila ginahimo.

Ning kasamtangan, mga dinakpan gipangbalhog sa selda sa Sasa PNP. (Jeepy P. Compio)