COTABATO CITY -- Nagsinabligay na sab og mga bala ang militar ug mga armadong grupo alas 9:45 sa gabii niadtong adlaw nga Sabado, Enero 18, sa probinsiya sa Maguindanao.

Sa taho gikan sa 601st Brigade nga gipaarakan sa mga miyembro sa Bangsamoro Islamic Freedom Fighters (BIFF) ang kampo sa mga sundalo sa utlanan sa Shariff Saydona Mustapha ug Mamasapano, Maguindanao.

Abtik nga nakamatikod ang puwersa sa kagamhanan nga mibalos sa pagpabuto sa ilang mga hinagiban batok sa mga rebelde.

Milungtad sa 30-minutos ang sinukliay og mga bala tali sa duha ka pundok gamit ang mga tag-as nga matang sa armas.

Nakugang ang mga sibilyan sa buto-buto sa armas hinungdan nga mura’g ilaga sila nga misuksok sulod sa ilang mga pinuy-anan.

Miatras lamang ang mga rebelde sa diha nga gipabuthan sila sa mga sundalo gamit ang 81 mm mortar.

Walay naangol o napatay sa militar samtang tulo ang gikataho nga patay sa BIFF sigun sa mga sibilyan nga nanghikling sa engkwentro.

Sa kasamtangan nagpadayon ang combat clearing operation sa mga sundalo uban ang mga sakop sa Citizen Armed Forces Geographical Unit (Cafgu) batok sa BIFF sa Maguindanao. (Edgar Fuerzas)