JOSE ABAD SANTOS, Davao Occidental -- Daling nag-alerto ang katawhan sa lungsod human nasinati ang tulo ka sunod-sunod nga linog niadtong Martes, Enero 14, 2020

Sa taho sa Philippine Institute of Volcanology and Seismology (Phivolcs), nasinati ang unang pagtay-og alas 8:06 sa buntag.

Matud sa Phivolcs, 3.5 magnitude ang linog nga mihapak mga 203 kilometro habagatang kasadpan sa Jose Abad Santos ug adunay gilawmon nga 14 kilometro.

Natala sab ang ikaduhang pagtay-og, alas 9:54 sa buntag, diin ang epicenter anaa sa 79 kilometro sa habagatang kasadpan sa lugar.

Anaa sa 3.6 magnitude ang gikusgon niini ug mga 106 kilometro ang gilawmon.

Banda alas 10:40 sa buntag, natala sa Phivolcs ang 2.3 magnitude diin ang epicenter anaa sa 85 kilometro sa habagatang kasadpan sa lungsod ug mga 20 kilometro ang gilawmon.

Way natalang damyos ug wa say gilaumang aftershocks sa maong mga linog nga tectonic in origin.

Matud sa Phivolcs nga wa sila’y natalang intensity sa linog, apan sa post sa usa ka netizen sa social media, giingong nasinati nila ang hinay nga pagtay-og sa Barangay Kapatagan, Digos City, alas 10:40 sa buntag diin hinay ang magnitude niini. (Orlando B. Dinoy)