GILUSAD sa mga awtoridad ang hugtanon nga imbestigasyon bahin sa tulo ka lumad nga gipatay ug gisunog sa giingong mga terorista sa probinsiya sa Maguindanao niadtong Biyernes, Hunyo 25, 2021.

Kini ang gibutyag mismo ni 6th Infantry (Kampilan) Division Spokesman Lieutenant Colonel John Paul Baldomar.

Mga biktima mga Teduray ug molupyo sa bukiron nga parte sa utlanan sa Datu Hoffer Ampatuan ug Datu Unsay sa maong probinsiya.

Naagian sa mga miyembro sa Bangsamoro Islamic Freedom Fighters (BIFF) didto sa ilang uma ang mga biktima ug gipamusil-patay pagkahuman gipangsunog.

Kahinumdoman nga usa sab ka Teduray nga buntis nga si Rosita Keninde ang namatay human naigo sa mibusikad nga improvised explosive device (IED) atbang sa iyang balay, samtang naangol ang iyang duha ka anak sa Barangay Tuayan, Datu Hoffer Ampatuan.

Niadtong miaging bulan sa Enero, dunay mga kabalayan sab sa mga Teduray ang gipangsunog sa BIFF sa South Upi.

Gikasuko sa BIFF ang pag-alsa sa mga lumad batok kanila ug wala na magparekrut sa mga terorista nga moanib sa pundok.

Mitaas sab ang ihap sa mga namakwit nga mga Teduray sa mga dapit nga gihasi sa BIFF.