IMPAS ang tulo ka tawo ug unom ang naangol sa van nga nadisgrasiya alas 3:45 sa hapon, Dominggo, Agosto 21, 2022, sa probinsiya sa Sultan Kudarat.

Ang mga biktima nga nakabsan sa kinabuhi mga molupyo sa Quiapo sa Metro Manila.

Gibutyag ni Sultan Kudarat Police Provincial Director Colonel Tom Tuzon nga sakay ang mga biktima sa usa ka Mitsubishi Delica van nga dunay plaka nga RUC-237 aron unta bisitahon ang ilang masakiton nga paryente.

Apan pag-abot sa van sa dulhugon nga parte sa kalsada sa Sitio Babancao Barangay Paril, Kalamansig, Sultan Kudarat kalit lang kining nawad-an sa preno.

Wala na makontrola sa drayber ang manobela ug diritso nga nahulog sa lawom nga bahin kilid sa kalsada ug mibangga pa kini sa punoan sa lubi.

Tungod sa kakusog sa impak sa pagkabangga sa van sa punoan sa lubi, tulo ang patay niini ug unom ang naangol.

Ang mga naangol daling gidala sa mga nagresponde nga mga pulis sa Sultan Kudarat District Hospital ug Cotabato Regional and Medical Center.

Sa kasamtangan, ang kapulisan sa Kalamansig, Sultan Kudarat nagpadayon nga nag-imbestiga kalabutan sa maong hitabo.