KIDAPAWAN CITY -- Padayong gisubay sa mga awtoridad ang pagpatay sa tulo ka mga payong-payong drayber sa giingong mga suspek nga nagsakay og motorsiklo didto sa Midsayap, North Cotabato alas 11 sa buntag, Lunes, Oktubre 11.

Mga namatay giila nga sila Ryan Utoc Bano, 20, minyo, nagpuyo sa Barangay Poblacion, Datu Piang, Maguindanao Province, Nasrudin Mantikayan, 25, minyo, molupyo sa Barangay Damatulan, Midsayap ug Taha Alimudin Bukay, 58, minyo, taga Barangay Buayan, Datu Piang.

Gibutyag ni Midsayap Chief of Police Lieutenant Colonel Rolly Oranza nga naglingkod lang ang mga biktima sa tagsa-tasa nila ka mga payong-payong nga motorsiklo samtang naghulat og pasahero likod sa DM store sa Sto. Niño Street, Barangay Poblacion 2, Midsayap.

Miabot ang riding in tandem suspects ug dayong gipamusil ang mga biktima.

Nakadagan pa unta si Bano apan gigukod siya sa mga suspek ug gitiwasan sa pagpusil hinungdan nga on the spot siya nga napatay human maigo sa ulo.

Samtang ang duha pa ka mga biktima nadala pa ngadto sa Dr. Amado Diaz Provincial Foundation Hospital apan gideklara gihapon silang dead on arrival gumikan sa grabeng samad pinusilan sa ilang lawas.

Walay nakaila sa mga sibilyan sa mga suspetsado nga pulos naka-bonnet ug naka-jacket nga daling miipsot palayo sa lugar.

Imbestigasyon sa kapulisan Midsayap Municipal Police Station nagpadayon aron nga masulbad ang krimen. (Edgar E. Fuerzas)